Joekskepèl Schöd um Laeg besteit oèt 20 man en is opgerich op 1 april 1994. As me de statute good doorluüës kin me vasstelle det Schöd um Laeg maar ein doel veur auge haet: “’t ammezére van de Venlose minse met gezellige mezièk en waal ’t ganse jaor door, maar veural tièdes de vastelaovend”. En det wuüërt nôw al jaore door ós kepèl nao boète gebrach en zeen we ouk truuk in ein stökske historie waovan ik óg noow kônd gaon doon.

Beej de oprichting kwame weej d’r achter det maar 3 ‘muzikante’ al ens ièrder ein mezièkinstrument in de hand hadde gehad. De res, de andere 14, hadde nog noeëts op ein träöt gespeuld. Zeej kóste waal behuùrlik met ein belke aan de veut euverwaeg (beej de voetbalclub), maar mezièk maake waas toch waal andere kook.

Naodet we ein instrument hadde gekaoze ginge weej aan de slaag ónder leiding van ôzzen ièrste dirigent Wiel Gatzen. Dae lièrde ôs, met paerds gedöld, noeëte laeze en perbeerde die saame met ós op de träöt, d’r oèt te kriege. Det waas in ’t begin herrie make op ein laeg straot.

Nao de ièrste maonde van “Struggle for Life” woorte weej as kepèl genuuëd um beej ózze veurzitter op de broèlof ein serenaadje weg te gaeve. ’t "Lang zulle ze laeve” en romantische “Spanish Eyes” zién um en zien vruike nog lang bliève achtervolge. Des ein feit waat zeker is. De opgenaome videoband wuuërt vandaag d’n daag nog as ‘Cult-film’ gezeen en steit bekind as d’n iérsten bootleg van Schöd um Laeg.

Gevolg: nao det ièrste optraeje kôs niks ôs mièr taegehalde en sjouwde we de nuuëdige ‘etablissemente’ aaf um op die meneer in de bekindheid te kómme (laes: ôs ster te doon rieëze). Veurbeelde heej van zien: ôs optraeje in d’n tennistempel De Schaapskooi, al kós ’t publiek det dao waas ôs toeëne (want ózze Venlose cultuur waas eur schienbaar nogal vraemp) neet bepaold waardère. Ós vastelaoves-optraeje in kefee De Keulse Barrière, wao we ózze kollega-muzikant (ziene naam bin ik vergaete) kómpleet wegbloze. En ein paar neet ónbelangrièke suksesse tièdes ’t opluustere van mièrdere jubilea in zaal Copacabana, want dao mót iddere zichzelf respecterende Joekskepèl zeker eine kièr gespeuld hebbe (vinde weej).

Nao jaore van hard werke en zweite is ’t ós noow, ónder muzikale leiding van d’n hièr Twan Gubbels, toch wónder baove wónder, gelök ein moor van mezièk te bringe die in Venlo en de wieje umgaeving ziene weerga neet kint. Ózze sterkste kant kump ’t beste nao veure met de nummers die weej de “Speedjoeks” neume. Maar ouk hartstikke moeëje “Ballades” (bekièk ôs repertoir) bliève deil oèt make van ôs muzikale menukaart.

En neet te vergaete is, det weej in ôs programma (kièk in de agenda) ’t jaorlikse oètstepke euver de päöl hebbe opgenaome. Die oètstepkes zörge d’r veur det weej nao ein jaor van ‘performe’ (hard werke dus) ôs ‘ne kièr kinne óntspanne. (ahum).

In 2005 vierde weej ós 11 jäörig bestaon. En ouk daobeej kinde we de nuuëdige hoeëgtepunte, met as climax, de kaegelaovend beej de Krómme Schuuver. Det ’t kaegele beejzaak waas, kinne allein de ‘insiders’ begrièpe. Vaerdere hoeëgtepunte oèt ós bestaon: de reis in 2003 nao Zwitserland, de opname in 2004 van ôs CD “Vriedaag”, ’t optraeje op de mert in Bernkastel in 2005 (kiék heejveur op youtube!!). En ouk in 2005 ós ièrste optraeje op de houfbuun van De Maaspaort in Venlo met de vastelaovend.

Heb geej belangstelling  nao ’t laeze van dees ‘kroniek’ en wilt ge waal ens de mezièk van Schöd um Laeg in ógge zaal, tent of wao dan ouk huùre, pak d’n tillefoon en bel! Heej ônder kint ge zeen wae det ge môt hebbe heejveur.

Bestuurssamenstelling Joekskapel Schöd um Laeg